係好重要，亦都好長嘅一個課題。
至於到底要唔要sleep train？睇人啦。如果唔train但你又應付到，其實真係唔係必須嘅。不過研究證實，嬰幼兒如果睡眠不足，係會好影響腦部發展。sleep trained嘅bb就往往冇睡眠不足哩個問題喇！
所以我覺得係好嘢嚟㗎！
到底點train？
正如我頭先所講，個課題長到可以講到2046。但必須嘅嘢包括：
Bedtime routine 睡眠儀式
即係每次瞓覺前都重複做嘅嘢，例如：閂窗簾，白噪音，奶嘴，安撫巾，包被，bedtime story等等
Bedtime routine係同bb溝通嘅方法，話俾bb聽「而家要瞓覺喇！」。只要每次都做，bb就自然學識幾時瞓落床就要培養情緒瞓覺。
建議瞓大覺之前嘅bedtime routine 同nap嘅bedtime routine 有少少分別，避免bb誤以為nap time然後瞓兩個鐘就醒（崩潰！）例如可以瞓大覺之前沖個熱水涼，咁就可以舒舒服服大覺瞓。
我的bedtime routine:
大仔：黑房，white noise，包被，奶咀（1歲後改用安撫巾代替）大睡前會沖涼，講goodnight
細仔：黑房，white noise，包被，唱twinkle twinkle，大睡前沖涼，講goodnight
了解bb睡眠周期
首先，話幾個冷知識俾大家知：
1. 嬰兒天生係唔識合埋眼就瞓覺，係要慢慢學嘅
2. 人類嘅睡眠有分周期嘅，只要上網搵下資料就知喇。而我地天生係會喺一個睡眠周期完咗就醒一醒，然後再瞓返，係天性令我哋要對周圍環境有所警惕。只要周圍安全/環境同瞓着前一樣，我地就會自然瞓返。醒嘅時間好短，所以我哋先唔記得啫。
3. bb嘅睡眠嘅淺睡期大約為30至45分鐘，之後會追入深睡期。所以bb啱啱瞓着唔易醒，反而瞓咗半個鐘左右就好易醒咗瞓唔返。
4. Sleep training 就係要train bb順利由淺睡期進入深睡期，從而達到一。覺。瞓。天。光！
自行入睡
bb要學識自行入睡，意思係就算佢瞓瞓下中間醒咗，喺冇人介入嘅情況下都可以自己瞓返。係咪好似好冇可能咁？但只要用啱方法，其實佢哋係做到嘅。
要bb學識自行入睡，第一樣好重要嘅嘢，就係盡可能不。哄。睡。
意思係，bb係要從清醒放上床到瞓着期間，盡可能減低干擾。抱呀搖呀阿媽陪呀拍到瞓哩啲，要逐漸減少。所有bedtime routine要喺放上床前做完，否則整個sleep train就冇可能成功。