做阿媽嘅都想俾「最好」嘅嘢俾自己bb。咁咩先係最好？我會話世界上冇「最好」，只有「最適合」。
咁乜嘢係「最適合」？我哋阿爸阿媽嗰代覺得食奶粉先文明（誤？？？），到我哋哩代就話人奶係最好最適合bb。的確，人奶係最天然、最無添加，喺理論上係最適合bb嘅。咁奶粉呢？奶粉其實冇毒（笑），同樣有齊咁多種bb所需嘅養分，亦同樣可以做bb嘅主食糧。我所講嘅「適合」，並唔係單純比較兩者嘅物理條件，而係綜合媽媽同bb各種情況同需要後，所得出最平衡和達到最大效益嘅餵哺方法。例如：媽媽餵人奶餵到喊曬，身又唔舒服心又唔enjoy，同老公bb關係都有拉扯，就可能真係要諗下其他方法（mixed feed 或者直頭餵粉）。
我曾經遇過一位媽媽，每次返嚟覆診都喊曬話唔夠奶同餵得好辛苦，我哋一直都繼續支持佢盡可能俾多啲advice佢啦。好記得到bb第4個月返嚟打預防針，媽媽打完招呼坐低，第一句就問我：「其實可唔可以唔餵人奶？我真係好唔鍾意好唔enjoy！」我當下立刻同佢講：「當然可以啦！」再解釋俾佢聽，其實bb同媽媽嘅心理健康係同樣重要，既然辛苦完你係唔enjoy嘅，放棄絕對冇問題！聽完之後嗰位媽媽開心到飛起。
重點係，after all，最重要係媽媽bb整個家庭都開心。至少以做阿媽同做姑娘嘅角度，我都認為咁先為之「最好」。