唔好誤會我，雖然我會開口叫patient放棄餵人奶，但其實我好支持餵人奶的，我兩個b都係人奶b嚟㗎！
我會用感恩而唔係幸運嚟形容，因為為到人奶絕。對。唔。係。幸。運！係用媽媽好多血汗換返嚟嘅！坊間都淨係褒獎人奶嘅好，但好似冇乜人講其實餵人奶係好辛苦嘅？我自己第一次做媽媽嗰陣，係好好好好希望會有人warn下我其實餵人奶係辛苦嘅，咁至少我有個心理準備吖（哭）～
太理論嘅我唔講喇，大家睇書都睇過。以下係我以專業角度＋媽媽實戰經驗得返嚟嘅貼士：
- 買本教餵人奶嘅書，生之前刨咗佢：冇人話我知餵奶要學嘅，試問有幾多人以為塞個b埋個胸就曉啜
- Join母乳媽媽交流group：生完之後坐月，鬼得閒嘢嘢去健康院咩！個group乜奇難雜症都search到解決方法㗎！
- 餵奶枕：姿勢好重要，一個好嘅餵奶枕會幫到你快啲掌握正確餵奶姿勢之餘仲可預防肩頸痛
- 埋身餵（親餵）：成功嘅秘訣係埋身埋身同埋身！阿媽道理，但好重要所以要講3次！（don’t get me wrong，絕對萬分佩服泵媽！🙇🏻♀️）
- 羊脂乳頭cream：初生bb唔識啜又發狂啜，蓮姐好易損曬流血。乳頭cream會加速復原，bb食咗都唔會有影響。
- 多飲水，多食碳水化合物，多休息，最好練成b訓你訓快速充電！
- 同伴侶預先有共識，特別係如果自己非常堅持餵人奶，就事先請家人支持自己。
- 快速上奶秘方：白鰂魚湯（搵少少鹽餣條魚10分鐘，落鑊煎香兩邊，饡酒再加水滾20分鐘即成）
- 適當時尋求協助：明白好多媽媽坐緊月去唔到健康院。坊間其實好多lactation consultant母乳顧問（通常係助產士or護士）做home visit嘅。可能貴少少，但需要幫手嘅時候就要搵佢哋㗎喇！同你病到死都要睇醫生一樣嘅道理。